Shoqata e Biznesit Grek në Shqipëri pati nderin të marrë pjesë në ceremoninë zyrtare të inaugurimit të godinës historike “Seferis”, që do të strehojë Konsullatën e Përgjithshme të Greqisë në Korçë. Ngjarja u zhvillua në prani të Ministrit të Jashtëm të Greqisë, Sh. T. z. Giorgos Gerapetritis, dhe Ministrit për Evropën dhe Punët e Jashtme të Shqipërisë, Sh.T. z.Igli Hasani.
Të pranishëm ishin Ambasadorja e Greqisë në Shqipëri, Sh.S. znj. Konstantina Kamitsi, Konsulli i Përgjithshëm në Korçë, z. Nikolaos Giotopoulos, Konsulli i Përgjithshëm në Gjirokastër, z. Sokratis Sourvinos, përfaqësues të Qeverisë dhe të Parlamentit shqiptar, Kryetari i Bashkisë Korçë, përfaqësues të pushtetit vendor, si dhe shumë miq dhe të ftuar nga të dy vendet.
Kjo godinë me vlera historike, ku ka shërbyer si Konsull poeti i njohur dhe fituesi i Çmimit Nobel, Giorgos Seferis, gjatë viteve 1936–1937, u restaurua falë mbështetjes së donatorëve nga komuniteti grek në Shqipëri dhe në Greqi, si dhe nga kompani e institucione të të dy vendeve – përfshirë edhe biznese anëtare të Shoqatës sonë.
Shoqata u përfaqësua nga Presidenti z. Denald George Tafani, Drejtoresha Ekzekutive znj. Helisabeta Caco dhe përfaqësues të bizneseve anëtare, të cilët nderuan me praninë e tyre këtë moment historik për marrëdhëniet greko-shqiptare.
Shoqata mbështet fuqimisht çdo nismë që promovon miqësinë, bashkëpunimin dhe lidhjet kulturore midis dy popujve, duke theksuar rolin e rëndësishëm të sipërmarrjes greke në zhvillimin e qëndrueshëm të rajonit.
